فجأة وبدون مقدمات، البيبي يشد نفسه لورا ويصرخ أول ما يشوف صدرك! إحساس بالرفض بيوجع قلب الأم، وممكن يخليكي تفتكري إن ابنك "كرهك" أو "فطم نفسه". في "نبعُ مارية"، بنقولك: اهدي خالص، ده اسمه "إضراب عن الرضاعة" (Nursing Strike)، وده مجرد "احتجاج" مؤقت مش نهاية المشوار. الطفل في السن الصغير ده مش بيفطم نفسه فجأة، هو بس بيحاول يقولك "أنا في حاجة مضايقاني".
أسباب الإضراب المستخبية (ليه بيعمل كده؟)
البيبي مش بيعرف يتكلم، فبيعبر بالرفض. الأسباب غالباً بتكون:
- ألم عضوي "مستخبي": ممكن يكون عنده "التهاب أذن" بيوجعه لما يبلع، أو "فطريات" في اللسان بتضايقه، أو "تسنين" مخلي لثته ملتهبة جداً.
- تغير "الريحة أو الطعم": البيبي أنفه حساسة جداً. لو غيرتي نوع "مزيل العرق"، أو استخدمتي "برفان" قوي، أو حتى نوع صابون جديد، البيبي ممكن يتلخبط. كمان تغير الهرمونات (زي اقتراب البريود) أو أكلة فيها بهارات قوية جداً ممكن يغير طعم اللبن بسيط.
- الخضة السابقة: لو البيبي عضك مرة وأنتِ صرختي من الألم "تلقائياً"، هو ممكن يتخض ويربط بين الرضاعة وبين رد فعلك العنيف (بالنسبة له).
- تشتت الانتباه: بعد عمر 4 شهور، البيبي بيبدأ يكتشف العالم، وأي دوشة أو حركة حواليه ممكن تخليه يسيب الرضاعة عشان يتفرج.
- التباس الحلمات: لو طفلك بياخد ببرونة أو تتينة فللأسف ده بعد فترة بيسبب رفض الثدي واعتماد الببرونة
روشتة "نبعُ مارية" للعودة للحضن الدافئ
عشان نكسر الإضراب ده ونرجع الرضاعة لمسارها، جربي الحلول دي بالترتيب:
- سحر التلامس الجسدي (Skin-to-skin): اقلعي البيبي هدومه (سيبي الحفاض بس) وخليه على صدرك "جلد للجلد" أطول فترة ممكنة. الوضع ده بيفرز هرمونات الحب والهدوء عندك وعنده، وبيرجع له "غريزة" الرضاعة من غير ضغط.
- خدي "هدنة" من الضغط: بلاش تجبريه يرضع وهو بيصرخ. لو رفض، شيلي الصدر خالص، العبي معاه وهديه، وارجعي جربي كمان شوية. الإجبار بيزود العند والخوف.
- الرضاعة في "حالة الاسترخاء": أغلب الأطفال في وقت الإضراب بيرضعوا وهما في حالة "نص نوم" أو هما لسه صاحيين من النوم. في الوقت ده دفاعاتهم بتكون هادية ومستسلمين لغريزة المص.
- تغيير الأجواء والوضعيات: جربي ترضعيه وأنتِ "ماشية" وبتهزيه براحة، أو في غرفة "ضلمة تماماً" مفيش فيها أي مشتتات، أو حتى خدي حمام دافئ معاه (Bath nursing)؛ المية الدافئة بتعمل استرخاء رهيب للجسم.
كلمة السر: طالما البيبي بيبل حفاضات مية كويس، متقلقيش من الجوع. شفطي لبنك عشان تحافظي على الإدرار، وقدميه له بـ "سرنجة" أو "كوباية" لحد ما الأزمة تعدي ويرجع لحضنك تاني.
تعليقات