ينفع أصوم وأنا برضع؟ 🤔أكتر سؤال بيتسأل لاستشاري الرضاعة في دخلة رمضان..
هل الصيام فعلا له تأثير على الرضاعة؟وايه العلامات اللي تخليني لازم أفطر؟
في البداية هل أصلا المرضع لها رخصة الفطر؟
نعم، إذا خشيت من وقوع الضرر على نفسها أو ولدها..
وده نابع من ايه؟
من إن الرضاعة حق شرعي للرضيع، "والوالدات يرضعن أولادهن حولين كاملين لمن أراد أن يتم الرضاعة"..
ولذلك ربنا رخص للأم المرضع الفطر حتى تتقوى على رضاعة الطفل بالذات لو هيا المصدر الأساسي والوحيد له..
ايه الحالات اللي وقوع الضرر فيها شبه مؤكد وعدم وقوعه استثناء؟
- أم بترضع طفل معتمد عليها اعتماد كامل بدون أي غذاء أو وجبات وهي الأم اللي بترضع طفل عمره أقل من ست شهور.
- أم بتعمل إعادة إرضاع لطفل رفض الرضاعة الطبيعية أيا يكن سن الطفل.
- أم لبنها بالفعل قليل وطفلها بياخد لبن صناعي إلى جانب الرضاعة الطبيعية لزيادة وزنه أو تحسين إخراجه.
- أم بترضع طفل عنده تحديات وصعوبات في اكتساب الوزن. - أمهات التوأم في السنة الأولى من الرضاعة.
- أمهات بترضع وعندها سكر نوع أول أو تاني.
ساعتها لازم نفتكر إن إصرارنا على الصيام بالرغم من تأكيد الطبيب على وقوع الضرر على الطفل يخالف مقصد من مقاصد الشرع وهو حفظ النفس.. ويعتبر تضييع للأمانة اللي ربنا حملها للأم..
فيه فئات ينفع تجرب الصيام وتقيم وضع الطفل؟ أيوة، الاطفال من عمر ست شهور لسنة، في الفترة دي الطفل بيكون دخله أكل في حدود وجبتين وبدأ يشرب ماية،
لو الطفل صحيًا كويس مبيمرش بأدوار تعب..
ووزنه بالمتابعة مع طبيب الأطفال أو استشاري الرضاعة كويس..
والأم صحيًا كويسة
نقدر نجرب الصيام بالشروط التالية:-
1- نعجل بالفطار ونأخر السحور.
2- ناكل وجبة إضافية بين الفطار والسحور.
3- نحافظ على شرب الماية كل من ساعة لساعتين من الفطار للسحور.
4- نقلل مجهودنا أثناء اليوم قدر المستطاع.
نراقب ايه؟
-نراقب حفاض الطفل
-نراقب سلوكه مع الرضاعة، مهم أول ما نلاحظ أي تغيير في سلوكه زي الرفض أو القريفة الزايدة أو بالعكس تقليل الرضاعة عن المعتاد..
ساعتها نفطر، وفي بعض الحالات ممكن نفطر يوم ونصوم يوم أو نفطر يومين ونصوم يوم وهكذا..
من بعد عمر السنة اعتماد الطفل على الأكل بيزيد وبيقل احتمالية وقوع الضرر عليه أو على الأم لكن تظل الرخصة معانا بالذات لو الطفل تعيانغأو بيسنن أو الأم صحيًا مش هتقدر على الصيام مع الرضاعة...
فطام الطفل فطام مبكر أو مفاجيء عشان نصوم قرار غير سليم وهيترتب عليه وقوع الضرر على الأم والطفل..
لكن الصيام في سن الفطام ممكن يساعدك تطبقيه بشكل تدريجي، ازاي؟
ده الي هنعرفه ف دردشة تانية من دردشة وحواديت نبع مارية ❤️
بودكاست مهم لمزيد من الاستفادة:
تعليقات