الرضاعة الطبيعية هي أجمل وقت للتواصل بين الأم وطفلها، لكن فجأة اللحظة دي ممكن تتحول لـ "خوف" وتوتر بسبب عضة مفاجئة من طفل لسه بيبدأ يكتشف سنانه الجديدة. في "نبعُ مارية"، بتجيلنا تساؤلات كتير من أمهات خايفات إن العض يكون علامة على ضرورة الفطام. تعالي نفهم الحكاية ونعرف إزاي نتصرف.
ليه طفلك "الكيوت" بيتحول لمؤذي فجأة؟
قبل ما تاخدي موقف دفاعي، لازم تعرفي إن الطفل في السن ده مش بيعض بدافع العدوانية، هو ببساطة بيستكشف:
- تخفيف ألم التسنين: اللثة في وقت التسنين بتكون ملتهبة وبتحرق الطفل، والضغط على حاجة ناشفة زي "الثدي" بيحسسه براحة مؤقتة.
- حب الاستطلاع: هو لسه مكتشف إن فيه "لولي" طلع في بقه، وعاوز يعرف الحاجة دي بتعمل إيه وممكن تضغط لحد فين.
- نهاية الرضاعة: غالباً العض بيحصل لما الطفل يشبع ويبدأ يزهق، فبيعتبر الثدي "لعبة" يشد فيها بأسنانة.
- لفت الانتباه: لو الأم مشغولة بالموبايل أو بتتكلم وهي بترضع، الطفل ممكن يعض عشان يخليها تبص له وتركز معاه (حتى لو رد فعلها صريخ!).
خطة العمل: إزاي توقفي العض من غير نكد؟
- رد الفعل الهادئ والحازم: لو صرختي بصوت عالي، الطفل ممكن يتخض ويخاف من الرضاعة (إضراب)، أو يفتكرها لعبة ويضحك ويعض تاني عشان يسمع الصوت ده. الصح إنك تقولي "لأ" بصوت واطي وحازم، وتسحبي الثدي وتنهي الرضاعة فوراً لمدة دقيقة.
- توفير البدائل قبل الرضاعة: لو طفلك في مرحلة تسنين واضحة، اديله عضاضة ساقعة قبل الرضاعة بـ 5 دقائق. ده هيخدر اللثة شوية ويقلل رغبته في العض وقت الأكل.
- التركيز التام: حاولي تكوني مركزة معاه. أول ما تلاحظي إن حركة البلع وقفت وبدأ "يلعب" بلسانه أو يشد بقه، اسحبي الثدي فوراً قبل ما العضة تحصل.
- التشجيع الإيجابي: لما يخلص رضاعة من غير ما يعض، احضنيه وبوسيه وقولي له كلام حلو. الأطفال بيفهموا لغة الحب والتشجيع جداً.
كلمة من نبعُ مارية: العض مرحلة مؤقتة جداً ومش مبرر أبداً للفطام المبكر. بشوية صبر وتوجيه، طفلك هيفهم إن الثدي لمصدر الغذاء والحب بس، مش للعض!
تعليقات