كل أم مرضعة عندها "قصة حب وكره" مع الساعة 3 الفجر. الوقت اللي بيبقى جسمك فيه محتاج للنوم، وطفلك بيقرر إنه محتاج يرضع. في "نبعُ مارية"، بنسمع كتير جملة "أنا هفطمه بليل عشان أرتاح". بس قبل ما تاخدي القرار ده، تعالي نعرفك ليه الساعات دي هي الأهم في رحلتك.
سحر الهرمونات في هدوء الليل
هل كنتِ تعرفي إن إنتاج اللبن مش ثابت طول اليوم؟ هرمون "البرولاكتين" (المسؤول عن إدرار اللبن) بيوصل لأعلى مستوياته في جسمك بين الساعة 1 صباحاً و 5 صباحاً.
- زيادة الإنتاج: الرضاعة في الوقت ده بتعطي إشارة قوية لمصنع اللبن عندك إنه يزود الإنتاج، وده بيضمن ليكي لبن كفاية طول النهار.
- نمو الدماغ: اللبن اللي بيفرزه جسمك بليل بتركيبة مختلفة، بيكون فيه بروتينات ودهون بتساعد جداً في تطور الجهاز العصبي ونمو مخ الطفل.
- النوم السريع: سبحان الله، لبن الأم بالليل بيحتوي على مادة "الميلاتونين" اللي بتساعد الطفل يسترخي وينام تاني بسرعة بعد الرضعة.
إزاي ترضعي بليل من غير ما تفقدي أعصابك؟
عشان الرضاعة الليلية ماتتحولش لـ "تروما"، اتبعي النصائح دي:
- وضعية الرضاعة الجانبية: اتعلمي إزاي ترضعي وانتي نايمة على جنبك والطفل جنبك (مع اتباع قواعد النوم الآمن). دي أكتر وضعية بتخلي الأم ترتاح وتدخل في "نص نومة" وهي بترضع.
- بلاش كشافات: حافظي على هدوء الغرفة ونورها الضعيف جداً. لو قيدتي النور العالي، مخ الطفل هيترجم إننا "صحينا" وهيقلب الرضعة بليل للعب وتنطيط.
- تجهيز الأدوات: خلي جنبك دايماً مية ليكي (لأن الرضاعة بتعطش) وفوطة صغيرة لأي تسريب لبن، عشان ماتضطريش تقومي من السرير وتفوقي.
- تأجيل تغيير الحفاض: لو الحفاض مش مليان أوي والبيبي مش مسلوخ، بلاش تغيريه بليل. الرضاعة بليل هدفها النوم، والتبليل البسيط مش هيقلقه زي "فرهدة" الغيار.
رسالة نبعُ مارية ليكي: إحنا عارفين إنك تعبانة، ومقدرين كل لحظة سهر. لكن افتكري إن الساعات دي هي اللي بتبني مناعته، وبتقوي الرابط النفسي بينكم. الأيام دي بتعدي بسرعة جداً، وبكرة يكبر وينام ليلة كاملة وتفتكري اللحظات دي وانتي مبتسمة.
تعليقات